郭富城東莞石龍祖屋成保護文物

如果阿叔無記錯，四大天王中，張學友祖籍天津，劉德華祖籍新會，黎明祖籍梅州，郭富城祖籍東莞石龍。一半天王嘅祖籍係大灣區，真系人傑地靈。

祖輩老金鋪已關門

阿叔最近經過石龍，喺市中心偶然發現一間叫郭忠成珠寶嘅老字號金鋪，原來呢間係郭富城曾祖父留下嚟嘅金鋪。阿叔好奇入去金鋪，睇吓會唔會碰到郭富城，鋪頭個靚女話，疫情後沒有見過郭富城，佢大佬則有時嚟過。而家間鋪頭仍係郭氏家族經營，不過而家嘅係新鋪，原來嘅老鋪係中山中路17號。

阿叔行到呢間老鋪，係一座三層高嘅嶺南典型騎樓建築，已經關門大吉，空置多年，歷經歲月洗禮，郭忠成金鋪如今顯得破舊，但通過保存完好嘅建築細節、高聳嘅外觀，路人仍能從中窺見呢座建築當年嘅宏偉氣勢。

講到呢條中山路，原來係有一段威水史。中山路民國建築群，建於1929年左右，係石龍最早建嘅馬路，馬路兩旁建築係傳統騎樓結構，石龍人民為紀念孫中山先生當年經常在廣州及石龍一帶搞革命活動，故命名為中山路。現在屬東莞市市級文物保護單位，類型為近現代重要史蹟及代表性建築。

當年嘅石龍，由於位於廣九鐵路中段，南北交通方便，而廣東受「西學東漸」影響，無論學術上或建築上都受到好大影響，騎樓係嶺南建築嘅一大特色，而建築物既有中式嘅古典大方，又有西式嘅華麗風情。例如郭忠成嘅舊鋪，露台兩旁及檐壁上雕刻咗精細西洋紋飾，企喺底部抬頭望去，能睇見顏色依舊豐富嘅西洋風燈座裝飾，不免令人遐想，若把燈打開，唔知整座建築會呈現乜嘢樣嘅華麗場景。

中山路騎樓建築群完整

中山路其實係從東至西由九條街銜接而成，上百年嘅舊樓依然保留落嚟，以現代嘅眼光睇，係一排排嘅舊樓，但咁嘅建築群係100年前，確係東莞最繁榮昌盛嘅商業街，東莞第一間銀行亦喺呢度開業，大金鋪亦有幾間，唔怪得石龍當時係廣東四大名鎮之一。而家嘅中山路特色騎樓建築群如此完整、規模宏大、風格統一，唔單止喺東莞少有，係珠江三角洲亦實屬罕見。

阿叔係中山路行嚟行去，穿插係騎樓底嘅石屎柱之間，只見部分鋪頭尚有店鋪開檔，但上面嘅民居已經空置頗多。今日嘅中山路已無咗昔日嘅繁華，但係石龍老街嘅韻味，並無隨住歷史嘅遠去而消逝，反而歷久彌新。

石龍老街仍然座落喺石龍老城區嘅角落，靜靜雞咁等待世人觀賞。

正所謂：騎樓舊街話石龍，其實並非鼻涕蟲！

柴灣阿叔