今年荔枝供應平穩網紅品種「冰荔」每斤¥380

端午節後，荔枝上市，今年嘅荔枝行情點樣呢？阿叔特地去松山湖搵花王潘講下乜嘢環境。

花王潘係松山湖唯一最大嘅美資大酒店打理全酒店嘅花草樹木，成間酒店面積大到20萬平方米，保留下來嘅各種荔枝樹有一兩千棵，而家已經結滿紅卜卜嘅荔枝，引到阿叔流曬口水。花王潘即時爬上一棵荔枝樹，摘下一批糯米糍俾阿叔品嚐，果然肉厚核細，清甜入肺。

花王潘話，東莞今年嘅荔枝種植面積與往年基本持平，大約13.5萬畝，今年嘅荔枝有七成左右嘅掛果率，屬「中上年景」，但由於受疫情影響，荔枝價格暫時平穩。

率先成熟嘅荔枝係妃子笑，六月初已上市，大約10人民幣一斤。至於桂味和糯米糍係6月25日前後上市，預計桂味大約15人民幣一斤、糯米糍大約25人民幣一斤。

荔枝速遞全國

呢個係大致嘅行情，如果要買平荔枝，可以到專門嘅荔枝批發點，例如東莞厚街嘅新圍荔枝市場，有果農直接賣荔枝，場面非常墟冚，桂味大約12人民幣一斤，糯米糍大約18人民幣，價格唔算貴。

阿叔睇到現場仲有快遞公司即時收快遞，直接發全國各地，10斤荔枝發東莞市收31人民幣，廣州及深圳39人民幣，上海地區120人民幣，北京地區126人民幣，有防熱嘅寶麗龍盒包裝，仲送埋六塊冰塊，認真服務周到。咁樣全國各地都可以品嚐到荔枝嘅美味，用荔枝送俾女朋友，俾佢好似有楊貴妃嘅待遇，真係好過送鮮花。

荔枝品種雖多，但大眾化嘅主流品種係妃子笑、桂味及糯米糍，但東莞亦有仙進奉、塘廈紅、觀音綠嘅特色品種，另外仲有一款網紅品牌「冰荔」，預訂價格高達380人仔一斤，且受到追捧，都咪話大陸嘅消費能力已經愈來愈高。

雖然荔枝營養價值豐富，睇起美味，食起爽口，但也要提醒各位「荔枝友」，每日進食荔枝最好不超過300克，仲要適量服用綠豆湯或綠茶水，減少荔枝嘅上火熱氣症狀。

正所謂：一騎紅塵妃子笑，無人知是荔枝來！

柴灣阿叔