千年不遇嘅新冠病毒，橫掃世界不經不覺已有一年零八個多月，全世界數以百萬計嘅死亡數目確係慘過打咗唔知多少次嘅戰爭，而且重係沒完沒了，唔知幾時先至可以收科。
面對突如其來嘅新病毒，中國嘅方案已經被世界公認係最出色嘅，不單止成功把病毒趕盡殺絕，而且以火箭嘅速度開發出多種疫苗讓全民免費接種。截至八月底，全國接種疫苗嘅數量達到20億次，接種完成嘅人數接近9億人。接種率最高係北京，全市18歲及以上常住人口全程接種率達到95.41%。大部分省市嘅接種率達到80%。廣東省如按照全省常住人口1.26億計算，全人群全程接種覆蓋率為70.83%。相比香港不足六成嘅接種率，香港應該要急起直追喇。
儘管打疫苗並不是百分百能抵檔病毒，但萬一中招，可以由死亡變重症，重症變輕症，在人群中建立防衛病毒嘅屏障，都唔知點解咁多人抗拒打疫苗。
阿叔最近亦千方百計打咗第一針疫苗，係北京科興，個中經歷可以分享一下，方便更多生話係大灣區嘅香港人知道如何打疫苗。
最簡單嘅方法就係上網預約。用手機上微信查找「粵健通」公眾號，然後登錄上去便可以預約接種，不過阿叔所在嘅東莞未有安排接受預約，阿叔可以搵到最近嘅接種點係深圳福永，打嘅係成都生物。另一個可以預約嘅地點係蛇口，打嘅係深圳康泰。另一個可以預約嘅地方則係廣州。
由於去深圳或者廣州都要一兩粒鐘嘅車程，打兩針要去兩次，阿叔決定放棄。東莞本地嘅接種點又多又大，但係只接受本地人預約，港澳臺同胞或者外國人要去指定嘅醫院先至可以接種，係東莞只有十間醫院為港澳臺人士及外國人接種疫苗。
阿叔教大家一個快靚正嘅辦法，就係聯絡你住緊嘅小區所屬嘅村委會，他們馬上給張表格填寫個人資料申請，幾日後便收到電話短信通知可以去東莞市人民醫院接種疫苗喇！都算係好方便，唔駛去深圳或廣州咁遠喇！
又或者向居住所在地台港澳辦預約登記。登記成功後各台港澳辦會與各接種點聯繫並通知本人按時前往。係東莞，每個鎮街都有台港澳辦，上網便可以輕易搵到聯絡電話。
香港人如果有居住證，便可免費接種，如果只有回鄉證，就要自費一百蚊接種一針。
東莞人民醫院只係逢週二及週四接種，所以接種現場人頭湧湧，排隊打曬蛇餅，排隊時間用咗成個幾鐘，等到辦好手續打完針，休息半小時才走人，前後用咗兩三個鐘頭。
打針後，醫院會出具有中英文嘅針紙，而且粵康碼在第二天會在二維碼中間跳出一個藍色嘅醒獅頭，仲有一個卡通獅子，感謝接種者「為共築免疫屏障出一份力」，非常得意。如果接種完第二針，獅子便會舞動起來，粵康碼中間那個醒獅頭也變成紅色，十分有趣。
粵康碼官方表示，舞獅在粵語裡諧音「無事」，寓意得到南獅的庇佑，大家都會平安無事，身體健康。
正所謂：
抗擊病毒打疫苗，大家都去瞄瞄瞄！
柴灣阿叔