東莞商場吸引人流靠飲食

有人說，大疫情不超過三年，果真如此，確係謝天謝地，仲捱多半年就可以天下太平喇。

不過呢個百年不遇嘅疫情已經打死N個行業，即使係實體店都難逃一劫，好多商場成片執冚，實在慘不忍睹。實體店中比較能頑強對抗嘅就係與食有關嘅行業，例如茶樓餐廳、生鮮超市等等，而其他諸如時裝店、鞋店等，日子便難頂喇！

阿叔最近去過東莞南城鴻福路一個超大嘅商場，由於係地鐵站上蓋嘅商場，人流確實唔少，但商場也花咗唔少心思去建設一條懷舊街道叫「莞邑故事」好食巷，裏面有多種各地特色小食店，仲有一個石龍站，成架綠皮火車開入商場賣牛雜，設計非常出位，賣碗牛雜都夠膽用一節火車廂。

疫情後時代確係艱難，歐美各國通脹嚴重，不斷加息令小業主供樓百上加斤，已經無多餘銀両去實體店消費，但各大商場亦要生存，於是想方設法吸引人流，呢招仲有一個作用，商場可以採用高科技，到處設人臉識別器，及時收集人流性別、年齡、訪問店鋪種類和逗留時間等等，呢啲大數據對商場大業主非常有用，可以精準招商及與商戶分享，協助商戶更好定位。舉個例子，世界著名嘅「某家家俬」，喺廣州及深圳都有分店，商場超大，梳化任坐，而且仲有個特大餐廳，幾乎係訪客都會去消費，原來呢間餐廳仲賺錢過賣家俬，真係估都估唔到。

阿叔仲發現，除咗餐廳外，呢間家俬大超市仲開埋一間「瑞典咖啡店」，完全係北歐風格嘅設計，非常有情調，美式咖啡不論冷或熱，一杯只係9.9人仔，認真抵飲。一家大細去睇家俬，可以飲飲食食過成日，咁樣引流，唔到你唔服。

正所謂： 實體經濟凍過水，想方設法靠自己！

柴灣阿叔