申請領取生果金「特赦」來了

香港有唔少老友記返大陸過退休生活，但係離開香港太耐，就攞唔到生果金，話多唔多，話少唔少，確係可惜。

香港政府有見及此，於是係2013年10月推出「廣東計劃」，讓選擇移居廣東養老的香港永久居民老人，每年無須返回香港便可領取俗稱生果金的長者生活津貼。後來又推出「福建計劃」，老人移居福建也可以申請。呢個計劃推行以來，有一個弊端，就係不是隨時都可以申請，所以即使人在廣東或福建，要等到社署「特赦」期間才可以申請，非常麻煩。

社署網站填表申請

阿叔特別提醒現在係廣東及福建嘅老友記，由於疫情嘅關係，社署又「特赦」，可以接受申請喇！各位要及時申請，因為唔知幾時又會落閘㗎！

現行「廣東計劃」及「福建計劃」適用於65歲至69歲老人，申請每月2920元嘅普通長者生活津貼，或者每月3915元嘅高額長者生活津貼，但申請呢兩種津貼都要通過每月入息及資產審查，單身人士月入唔可以超過10430元，總資產唔可以超過374000元，而申請高額長者津貼嘅資產上限就是係163000元。

如果兩公婆一齊申請，每月入息唔可以超過15810元，總資產唔可以超過568000元，而申請高額長者津貼嘅資產上限係24700元，咁嘅條件有好多老人都申請唔到呢啲津貼。

而唔駛入息限制及資產審查嘅高齡津貼，每月只有1515元，但要70歲以上先至有條件申請。一個月只係得千幾蚊，真係只夠買生果，飲多餐茶都唔夠囉！

社署嘅廣東計劃辦事處係上水廣場21字樓，以前要親自上辦事處辦手續。阿叔提醒各位老友記，現時可以唔駛親身去申請喇，可以在社署網站下載申請表格，填妥後寄回去就可以。不過，各位老友記最緊要影印以下幾個檔：

1. 香港身分證副本、
2. 大陸回鄉證副本、
3. 大陸居住證（有的話）副本、
4. 居住社區的證明或者派出所證明、
5. 香港銀行存摺副本。

有齊上述檔副本先好寄申請表，如果唔齊就會浪費時間。

社署已委任香港國際社會服務社為「廣東計劃」及「福建計劃」下長者生活津貼的代理機構，負責協助基於健康理由未能回港辦理申請手續的長者完成申請、進行會面和個案複檢，以及處理查詢等。不過最有效率嘅方法就係打香港社會保障辦事處嘅電話31053266，佢地嘅人員好有耐心解答各種問題，值得點讚。

正所謂：少小離家老大回，廣東計劃要知會。

柴灣阿叔