疫情錯過禾雀花期深圳首設寵物方艙

經歷咗差唔多1個月嘅抗疫，東莞終於「摘星」，即係達到動態清零，手機行程碼上顯示去過嘅城市沒有封控區及管控區，屬於低風險地區，去到其他地方可以避免隔離或者不受歡迎，無端端被打返轉頭。

禾雀花外形像禾雀

3月正值春風又綠江南岸，繁花似錦嘅季節，阿叔每年呢個時候，都會去東莞萬江濱江體育公園欣賞奇特嘅禾雀花，但可惜公園關閉咗一段時間，待阿叔4月初重遊濱江公園嘅禾雀花「大道」時，已到花季嘅尾聲。幸好呢度嘅禾雀花夠多，仲有好多花未謝，阿叔亦老懷安慰也！

禾雀花，又叫雀兒花，係國家二類保護植物，因形酷似禾雀而得名。一串串禾雀花，開在藤蔓上，吊掛成串，遠看像葡萄，近觀像麻雀，與其他花比較，外形獨特，氣味香甜，深受蜜蜂的喜愛。

禾雀花通常盛開於陽春3月，奇特之處在於唔似其他花那樣含苞欲放，亦唔會完全盛開。花開時，花瓣卷攏成翅狀，整個花體通透玲瓏，初開時為乳白色或者淡綠色，盛開時色如檸檬黃，再變為粉紅色和橙紅色，可謂神奇。每當春雨綿綿之時，生長在郊野或者深藏在山林嘅禾雀花依藤而生，一簇簇，一串串，風情萬種，韻味流傳。

義工幫忙抗疫

就係禾雀花盛開嘅季節，深圳封城1周，東莞大朗告急，10幾輪嘅全民檢測，除咗辛苦嗰啲「大白」，仲有好多協助市民嘅「小藍」，佢哋有好多係東莞嘅義工。

內地叫義工為「志願者」，自願報名參加，沒有甚麼條件，填一張表格，交3張相，然後每年服務一段時間就可以喇。呢個義工組織非常高效率，只要註冊入群後便會得知有乜嘢活動嘅通知，細到係路邊幫助行人過馬路，大到跨區支援抗疫都有，基本上，上到義工網就可以登記工作。參加義工當然沒有酬勞，但有積分制度及服務證書等等，而且有適當嘅補貼，包括交通補貼、人身意外傷害保險及住院醫療保險等。

方艙託管隔離者寵物

疫情期間，好多人因為中招而要送去隔離，他們所養嘅寵物點樣生活？隔離回來餓死點算？

聽說深圳有幾10人養咗寵物，所以有不少隔離人士留下需要照顧嘅貓狗倉鼠等小動物，而深圳設一個更人性化嘅「寵物方艙」，由義工免費託管集中隔離人士嘅寵物，提供觀察護理、健康檢測及醫療保障等基本服務，總之唔會餓死寵物已經好受歡迎。

「寵物方艙」也引起不少爭議，因為愈來愈多在大城市生活嘅中產及年輕人喜歡養寵物，而內地很多地方對流浪貓狗只會一刀切殺無赦，引起愛護動物人士有所不滿，而深圳「寵物方艙」的出現，背後傳遞出「科學防疫」及「尊重生命」嘅態度，體現對每一個生命嘅關愛及呵護，值得點讚。那怕疫情防控要從嚴從速，也始終不忘人性化嘅管理。

從呢個角度睇內地嘅城市管理，的確有好大進步。

正所謂：
天生一串翠玲瓏，薄蠟冰脂透玉宮。
疑是枝頭棲巧雀，披嵐飲露不驚風。
疊層禾雀花千串，留影奇林不願離。
抗疫隔離家雖空，幸有方艙唔駛瘋。

柴灣阿叔