珠海食海鮮避騙攻略

灣區疫情有好轉，大朗解封，深圳已轉為低風險地區，所以阿叔趁機到處散心，去珠海飲茶食海鮮。

海鮮街水靜河飛

嚟到珠海梗係要食番餐海鮮大餐喇，阿叔一於舊地重遊，去灣仔海鮮街揾嘢食。呢度當然係珠海嘅灣仔喇。海鮮街喺南灣南路澳門環島遊碼頭對面，路口右邊有多間澳門手信鋪頭，左手邊有間灣仔海味中心，裏面有多間專門賣海味嘅店鋪。

海鮮街由一排3層樓高嘅建築物組成，好有澳門街特色，全部都係海鮮酒家，但所有酒家都無魚池，因為酒家另一邊就係海鮮街市，好似鯉魚門海鮮檔咁樣，遊客喺海鮮檔買海鮮，然後拿到酒家開餐，酒家只收取加工費。

呢條海鮮街以前非常墟冚，因為呢度對住澳門，對面海就係新葡京酒店，夜晚燈火通明，好似喺澳門一樣，內地遊客去唔到澳門，喺呢度都可以感受到賭城嘅魅力，淨係做內地遊客嘅生意都做唔切，但係經過呢兩年嘅疫情，呢度即使係周日，已經水靜河飛，小貓三四隻，手信鋪頭店員多過遊客，海鮮檔就更係「王小二過年」，長長嘅海鮮街檔口，冇開檔嘅多過開檔。阿叔一行過去，個個店主都招呼阿叔，有人甚至推銷兩蚊一隻鮑魚，阿叔抱住便宜莫貪嘅宗旨，馬上避之則吉。

直接到酒樓點菜

阿叔遇到一間「漁民世家」嘅老闆老王，教阿叔如何避騙。佢話如果去海鮮檔買嘢，一定要多比較，要注意佢地有無掉包，至於呃秤呢啲行為，要預咗佢㗎喇，點計得咁清楚？

老王講另外一個辦法就係到老實嘅酒樓點菜，佢地與本地附近嘅海鮮市場檔口有配合，以市場價格送海鮮到酒樓，咁樣就平好多。呢招確係使得，海鮮送到酒樓，先驗明正身，全部新鮮生猛，酒樓先至去加工。

阿叔咁樣只係花300大洋，便買到鮑魚、蟶子王、扇貝、沙蝦同埋一條斤半嘅花斑，酒樓嘅加工費也明碼實價，有一大本價格表，明碼實價，例如清蒸普通魚18蚊、清蒸石斑魚28蚊、清蒸紅星39蚊，上湯或芝士焗龍蝦59蚊（伊面底加79蚊），蒜蓉粉絲蒸鮑魚29蚊，避風塘炒蟹39蚊等等。阿叔一行3人，加工費及椒鹽腐乳通菜連白飯茶芥只收兩百大洋，咁樣一次海鮮大餐消費500大洋，雖然唔係最平，但起碼唔會俾人斬到一頸血。

正所謂：揾食不惜腰間錢，海鮮行情不如前！

柴灣阿叔