順德菜落戶東莞粥底火鍋愈做愈旺

順德以前種桑養蠶，魚塘處處，河鮮出名，自古有「食在廣州，廚出鳳城(順德別稱)」嘅民間諺語，以讚揚南粵飲食文化之豐富、深厚。

順德菜點解咁出名？因其以豐富多樣嘅食材著稱，以博取眾長嘅烹飪技藝見長，以清、鮮、爽、嫩、滑為特色，所以阿叔每次去佛山一定要嘆地道順德菜。

由於疫情關係，政府呼籲市民就地過年，阿叔雖然寄居東莞，但一樣可以唔駛去順德都品嘗到順德菜，皆因東莞有愈來愈多順德菜館，不但有原汁原味嘅各種順德名菜，而且環境仲無得頂添！

粥底代替湯底打邊爐

早係十幾年前，厚街就開咗間叫「毋米粥」嘅順德菜館，招牌菜係用粥底代替湯底俾人打邊爐，劏條10斤8斤重嘅橫崗水庫大頭魚，魚頭魚骨用油炸，魚肉切片打邊爐。呢種毋米粥火鍋唔肥唔膩，非常受歡迎，所以呢間順德菜館靠粥底火鍋愈做愈旺，認真唔簡單。毋米粥總店喺順德，唔係猛龍唔過江，分店開到最接近莞城嘅厚街鎮，一開便是10幾年。

阿叔發現另一間叫「𠮩𠹌館」嘅順德菜館嚟東莞開分店竟然打孖上，分別係萬江及虎門各有分店。不過阿叔就鍾意虎門鎮口長堤路個間分店，門面大氣，裝修復古，走過嶺南式嘅庭園，小橋流水，詩情畫意，大堂嘅古木檯椅，仿如前朝客棧，甚有懷舊Feel。

大年初一，虎年第一次一家人團團圓圓，健健康康過新年。點了新年菜「撈起三文魚」，魚肉新鮮，擺設新潮，意頭又好。唯一要投訴嘅就係檯上嘅涼菜及小食不可以退，而且桔子一定要兩盤，加上過年服務費加收15%，一餐1100蚊嘅菜，埋單盛惠1500大洋，人均要近200元。

呢度魚池仲有阿拉斯加大蟹，468蚊一斤，老鼠斑598蚊一斤，海紅斑438，東星斑298，青衣388，麻斑268，澳洲龍蝦及泰國瀨尿蝦都有，價格美麗，兩隻手板咁大嘅瀨尿蝦要735蚊，仲係無膏嘅公蝦，都幾斬客，一碟例牌黑胡椒肉蟹要198蚊，咁樣兩個人一餐要破費千幾蚊，人均700蚊。所以喺咁嘅順德酒樓食海鮮，一定要預咗大出血。

順德美食之風萌芽於秦漢，孕育於唐宋，成型於明代，興盛於清中，鼎盛於民初，輝煌於當下，經過千百年的傳承改良，形成咗獨樹一幟嘅風格，加上有咁嘅懷舊環境，係大城市都揾唔到嘅，破費都算喇。

順德獲授「世界美食之都」稱號

唔講唔知，順德係全國有名嘅廚師之鄉，2014年1月，由中國烹飪協會、順德職業技術學院共同組建嘅中國烹飪學院正式落戶順德，咁樣就可以將順德菜傳承下去，繼續發揚光大，怪不得係2014年12月1日，聯合國教科文組織授予廣東順德「世界美食之都」稱號，順德成為中國第二個獲此殊榮嘅城市，也是全世界第六個獲此殊榮嘅城市。

順德菜主要由大良、勒流、容桂、倫教、陳村、樂從、北滘、龍江、杏壇、均安等10個鎮街嘅特色美食組成。代表作有炒牛奶、大良雙皮奶、薑撞奶、金榜牛乳、大良蹦砂、倫教糕、陳村粉、雞仔餅等，有鹹有甜，有小菜也有硬菜。

阿叔聽講順德容桂有間叫做「豬肉婆」嘅高檔私房菜，等疫情過後，阿叔一定去順德再嘆正宗嘅順德菜。

正所謂：𠮩𠮩𠹌𠹌順德菜，識食要揾豬肉婆。

柴灣阿叔