灣區生活小點滴港大醫院有套餐

香港人喺灣區睇醫生，最大嘅問題係沒有醫保，無論在小診所或大醫院睇病都要付全費，如果係頭暈身熱嘅小問題，通常一百幾十蚊就搞掂，但如果係大病或者要施手術，咁費用就無譜㗎喇，少則一萬幾千，多則十萬八萬，真係唔講得笑。

如果住喺深圳或附近嘅港人，可以就近去香港大學深圳醫院睇病，會比在本地嘅醫院看病有不同嘅體驗。

最受惠嘅系年滿六十五歲嘅長者，可以使用醫療券付費，享受一年2000港元嘅額度，可以支付診金及檢查費用。由於醫療券每年有2000元，未用完啲金額可累積至其後年份使用，累積上限為港幣8000元，加上政府在2019年額外向合資格長者發放一次性嘅1000元，雖然不算很多，但也算可以享受到一點福利。

對於有長期病患嘅香港人，以前要隔一段時間回香港取藥，或者委託工聯會東莞辦公處代為取藥，也可以喺港大深圳醫院取藥，這樣便不需要過關那麼麻煩喇。

去港大醫院睇病，可以通過網上預約，各科嘅睇症期一目了然，而且排期快，唔駛好似喺香港睇公立醫院等咁耐，可以早睇病，早發現，早醫療。如果老人家唔識用電腦或者手機預約，也可去現場睇專科，咁就要碰運氣，如果唔可以即時睇到，亦可以現場排期。

專科診室內有大電視屏幕俾病人睇到輪侯號碼，休息間比較安寧，入到醫生房後可以關門，其他病人不會看到睇病情況，保護私隱到位。

收費也開大陸醫院嘅先河，睇普通科收二百元包診金及一周期的藥物，睇其他科，診金一百，藥物開多少收多少，明碼實價。一般常用嘅藥物唔算貴，例如給膽固醇病人嘅瑞舒伐他汀鈣片或者阿托伐他汀鈣片，每粒0.228元及0.315元人民幣，價格非常平民化喇！

仲有一種收費更加盞鬼，叫做“手術病例打包收費”，共有六十七項之多，即包括手術、住院及藥物等等費用，唔駛擔心打死狗講價，呢種收費亦係一種創新。小手術如小孩切包皮，收費3,370元（人民幣，下同），大手術如肺癌切除肺葉，收費81,790元。你點睇呢？

正所謂：港大管理創新多，收費合理無囉唆

柴灣阿叔